Véngneuzeprinsenbal 2020

Prinselééve Prins Mick I

Vréjdich 10 Jannewarrie

Éjndelek waar ’t zò witj. Vandaag wért ‘t ónthult dè ik prins van de Véngneuze bén. Ik hoefde ‘t gelukkig nie langer gehéjm te haawe. Dréj wééke is tòch wal laang um niks te maage zégge teege min vriende.

Ik stóng mi wa vriende in de zaal van de Vangrail te waachte tòt we woore utjgeroe:pe, want ik woor prins, mèr min vriende moochte dè toe nòg nie weete. Toe woore we óp ‘t poodiejum geroe:pe dur de Kammerèùj, ‘t waar beest spannent. Dòrnao ginge we nò boove en hèbbe èfkes gepròt mi de organniezaa:sie. De uurste groep ging nò ónder en woor ónthult. Dòrnao moos de twédde groep wòr ik in zaat. We lieppe umlég en moose róntloeëpe óp ‘t poodiejum èn dan stil stao. De andere vier van óns gruupke woore ónthult, mèr d’r waar nòg génne prins òf prinsès ónthult. Dus d’r weese óp dè moomènt al veul mènse dè Femke en ik prinsès en prins zòn wéére. Nòdè de ganse Rò van Éllef de mantel eum èn steek óp haa, kreege Femke èn ik de steek èn ónze mantel ók eum. Toe moose we ónze spietsj zégge. Ik vóng ‘t beest spannent, mèr ók wal wér sjòn. We pròtte wa èn toe sloote we af mi ónze spreuk. Dòrnao din we ‘ne pooloonééze. We ginge nòg wa uurkes danse, zinge en springe. Jòmmer genóg waar ‘t toe tòch ècht béjnao afgeloeëpe. We din nòg ‘n leeste weurtje èen ginge nò boove. Dòr ginge ónze mantels èn steeke af èn we ginge umlég in ónze kòl.  We ginge nòg mi wa kinjer nò Egem èn toe waar ‘t tòch wal ècht afgeloeëpe.

‘t Waar ‘n TÓP aovent.

Groetjes Prins Mick 1

Prinsèsselééve Prinsès Femke I

Éjndelek is ’t zò witj, vanaovent moocht ik ‘t éjndelek bekéént maake. Want dan duur:e dréj wééke beest wal laang, as ge dréj wééke niks teege òw vriendinne maacht zégge. ‘t Waar vréjdigaovent  tie:n jannewarrie. We zaate tusj èn de keuketòffel èen han vur de leeste kieër geoefent wa ik dien aovent ging zégge.

Toe ‘t titj waar, ging ik ‘n vriendin óphaale. Ik wees wal al dè zéj in de Véngneuze zaat en dè wees zéj ók van méj. Mèr ze wees nie dè ik prinsès zao wéére. Èn ik waar suupper hiepper èn vóng ‘t suupper spannent. We ginge dòrnao mi alle vriendinne saame nò de Vangrail, de Véngneuzetèmpel, dè vóng ik wal sjòn dè dè koos.

We stónge vur ‘t poodiejum te lusjtere nò ‘t afsjéjtswoort van Prins Maurits en Prinsès Isa. Toe vóng ik ‘t tòch wal spannent wéére, want övver ‘n paar menutje stao ik dòr, daacht ik toe. Èfkes latter ginge ze ók bekéént maake wie d’r béj de Kammerèùj kwaame. Èn toe ginge de Kammerèùj de nééj Véngneuze utj de zaal haale. We stónge mi z’n alle óp ‘t poodiejum, want wéj zin de nééj Véngneuze.

Mi z’n alle ginge we dòrnao nò boove en ginge óppe bank zitte. De Rò van Éllef ging raoje wie de néjje Prins en Prinsès zao wéére. Èn toe mooch ik éjndelek teege ur zégge: Ik bén de nééj Prinsès van de Véngneuze. Toe ginge we óns eumtrèkke èn ginge we in twieë groepe nò ónder. Ik zaat béj de twédde groep. En éjndelek mooch ik beneeje ók bekéént maake dè ik de nééj prinsès van de Véngneuze in 2020 mach zin. Toe moose wéj óns weurtje doe:. Ik vóng ’t kééjspannent, mèr gelukkig ging alles goe. Saame mi Prins Mick I, de Rò van Éllef en de kammerèùj hèbbe we d’r ‘n hél groeët fést van gemakt. De hélle aovent gefést. We moose ók óns footoolisje óphange. Want d’r hééngt nòw ‘n footoolisje van Prins Mick èn méj in de Véngneuzetèmpel.

‘t Waar ècht nòg ‘ne suuper sjònne aovent èn ik héb t’r van genoote. Mèr toen waar ‘t helaas alwér afgeloeëpe. We ginge mi zin alle nò boove, dòr ginge we ónze steeke aflégge. ‘n Paar mènse van de Kieveloeët die waare ók mee nò boove gegao, want die ginge óns veurdoe: hoe zéj ‘t aaltitj din èn dè waar óp zich wal intressant.

Mèr toe waar den uurste aovent tòch helaas ècht vurbéj. Mèr ik hèp d’r ècht hél èrrich van genoote. Bedankt allemòl vur de sjònne aovent. Ók al waare ge d’r nie béj, dan hoop ik òllie wal te zie: mi de vastelaovent.

Groetjes, Prinses Femke I